Conclúid na Díospóireachta maidir leis an bhFuath sa tSochaí a Chomhrac
Tar éis na míonna d’ionchur agus de phlé géarchúiseach, tá an díospóireacht maidir leis an bhFuath sa tSochaí a Chomhrac curtha i gcrích ag Ardán Rannpháirtíochta na Saoránach. Roinn saoránaigh ó gach cearn den Eoraip a dtuairimí faoi chúiseanna agus spreagthaí éagsúla an fhuatha agus faoi réimsí éagsúla gníomhaíochta chun aghaidh a thabhairt orthu.
Na smaointe a fuarthas ó shaoránaigh ar an Ardán, is iad a bhí mar bhonn le plé an Phainéil Saoránach Eorpach maidir leis an bhFuath sa tSochaí a Chomhrac. Déanfaidh an Coimisiún Eorpach bearta leantacha bunaithe ar na torthaí sin, rud a bheidh mar threoir freisin ag tionscnaimh an Choimisiúin amach anseo.
Tá an tuarascáil chríochnaitheach maidir le torthaí na díospóireachta le fáil i rannán na ndoiciméad thíos.
Cén fáth a bhfuil an fuath sa tsochaí á phlé againn?
Is mór an chúis imní é an méadú atá ag teacht ar an bhfuathchaint agus ar an bhfuathchoireacht san Eoraip inniu. Ní hamháin go ndéanann an fuath dochar dóibh siúd ar díríodh orthu go díreach ach cuireann sé an comhtháthú sóisialta agus an díospóireacht dhaonlathach i mbaol freisin.
I mí na Nollag 2023 ghlac an Coimisiún Eorpach Teachtaireacht dar teideal ‘Ní ghlacfar leis an bhfuath: Eoraip le chéile i gcoinne an fhuatha, lena n-iarrtar plé faoi stiúir na saoránach maidir le conas bogadh ón deighilt go hurraim chomhroinnte, dínit agus comhionannais, ar bunluachanna an Aontais Eorpaigh iad.
Mar chuid den phróiseas sin, d’fhorbair 150 saoránach ó na Ballstáit uile 21 mholadh inghníomhaithe. Cuimsíodh orthu sin sainmhíniú an Aontais ar an bhfuathchaint a nuachóiriú, córais tacaíochta d’íospartaigh a neartú, oideachas cuimsitheach a chur chun cinn, agus feachtais feasachta a sheoladh chun an fuath ar líne agus as líne araon a chomhrac.
Dul i ngleic leis an bhfuath: Cad é atá i gceist?
Cé nach bhfuil sé éasca méid an fhuatha a thomhas, d’fhéadfadh roinnt figiúirí léiriú a thabhairt:
- Tháinig méadú 30% ar nimh fuatha idir mí Eanáir agus mí Mheán Fómhair 2023, as 8 milliún teachtaireacht ar líne a ndearnadh anailís orthu san Aontas.
- D’fhulaing 55% de na freagróirí ar shuirbhé de chuid Ghníomhaireacht an Aontais Eorpaigh um Chearta Bunúsacha an t-idirdhealú ciníoch san Aontas níos mó ná trí huaire ó 2022 go 2023.
- Tá foréigean fisiceach nó gnéasach fulaingthe ag bean amháin as gach triúr uair amháin ar a laghad.
Conas is féidir linn an fhuathchaint agus an fhuathchoireacht a chomhrac?
D’iarramar do chuid smaointe agus do thaithí phearsanta uait maidir leis an gcaoi ar féidir linn feabhas a chur ar an meas frithpháirteach laistigh dár bpobail. Le linn 10 mí, bhí deis agat páirt a ghlacadh sa díospóireacht agus do mholtaí a roinnt maidir leis an gcaoi ar féidir leis an gCoimisiún Eorpach aghaidh a thabhairt ar an bhfuath sa tsochaí. I measc na bpríomh-mholtaí a d’eascair as an díospóireacht bhí:
- Feasacht a mhúscailt tríd an oideachas agus tríd an dioscúrsa freagrach
- An cuimsiú agus an aontacht a chur chun cinn trí mhothú muintearais a chruthú inár bpobail
Institiúidí daonlathacha a neartú agus meas agus caoinfhulaingt a spreagadh
Cliceáil ar ‘Tuilleadh eolais’ le féachaint ar an bplé iomlán.
Cad atá déanta ag an Aontas go dtí seo maidir leis an bhfadhb sin?
Tá tionscnaimh rialála agus tionscnaimh bheartais araon sa chreat le haghaidh gníomhaíochta i gcoinne fuatha ar leibhéal an Aontais. Ní forléargas uileghabhálach atá sa mhéid thíos: lean an nasc seo chun tuilleadh a léamh faoin gcreat dlíthiúil agus beartais chun an fhuathchaint agus an fhuathchoireacht a chomhrac san Aontas.
Bearta atá ann cheana chun an fhuathchaint agus an fhuathchoireacht a chomhrac
- Cinneadh Réime 2008 maidir le cineálacha agus léirithe áirithe ciníochais agus seineafóibe a chomhrac
- Teachtaireacht ón gCoimisiún Eorpach i mí na Nollag 2023 ‘Ní ghlacfar leis an bhfuath: Eoraip le chéile i gcoinne an fhuatha’
- Straitéis an Aontais maidir leis an bhfrithsheimíteachas a chomhrac agus saol na nGiúdach a chothú
- Creat Straitéiseach an Aontais maidir leis na Romaigh um chomhionannas, um chuimsiú agus um rannpháirtíocht
- Plean Gníomhaíochta an Aontais in aghaidh an Chiníochais
Bearta chun dul i ngleic leis an bhfuathchaint neamhdhleathach ar líne
Chuir an Painéal Saoránach Eorpach maidir leis an bhFuath sa tSochaí a Chomhrac a mholtaí faoi bhráid an Choimisiúin Eorpaigh
Le linn trí dheireadh seachtaine, tháinig 150 saoránach a roghnaíodh go randamach ó na 27 mBallstát uile le chéile chun plé a dhéanamh ar na cúiseanna atá le fuath san Aontas, sin agus an méid atá taobh thiar de. Phléigh siad freisin na réimsí éagsúla gníomhaíochta atá ann chun aghaidh a thabhairt orthu.
I dteannta a chéile, tá sraith moltaí curtha ar aghaidh ag na saoránaigh a chuideoidh le dlíthe an Aontais amach anseo a mhúnlú agus a chuirfidh le tionscnaimh de chuid an Choimisiúin atá le teacht.
Naisc ghaolmhara
Doiciméid
