An Painéal maidir leis an bhFuath sa tSochaí a chomhrac

I dTeachtaireacht 2023 dar teideal ‘Ní ghlacfar leis an bhfuath: Eoraip le chéile i gcoinne an fhuatha’, iarrtar go gcruthófaí spás idirphlé uile-Eorpach chun plé a dhéanamh ar bhealaí chun aistriú ón bhfuath agus ón deighilt chun taitneamh comhchoiteann a bhaint as ár luachanna Eorpacha, is iad sin an comhionannas, meas ar chearta an duine agus an dínit. Bhí an Painéal Saoránach Eorpach maidir leis an bhFuath sa tSochaí a chomhrac ar cheann de na freagraí ar an nglao sin.  

Bhí sé d’aidhm ag an bPainéal gníomhaíochtaí beartais a shainaithint, mar aon leis na gníomhaithe ábhartha uile ba cheart a bheith rannpháirteach ar leibhéil éagsúla, cinnteoirí, an tsochaí shibhialta, an earnáil phríobháideach agus saoránaigh ina measc. 

Sna 21 mholadh a chuir na saoránaigh le chéile, moltar bealaí nithiúla chun an fhreagairt ar an bhfuathchoireacht agus ar an bhfuathchaint a neartú, spásanna sábháilte cuimsitheacha a chruthú ar líne agus as líne, agus leas a bhaint as acmhainneacht na meán agus na n-uirlisí digiteacha chun cultúr an mheasa a chothú. 

Le linn trí dheireadh seachtaine, tháinig 150 saoránach a roghnaíodh go randamach ó na 27 mBallstát uile le chéile chun plé a dhéanamh ar na cúiseanna atá le fuath san Aontas, sin agus an méid atá taobh thiar de. Phléigh siad freisin na réimsí éagsúla gníomhaíochtaí atá ann chun aghaidh a thabhairt orthu. 

I dteannta a chéile, tá sraith moltaí curtha ar aghaidh ag na saoránaigh a chuideoidh le dlíthe an Aontais amach anseo a mhúnlú agus a chuirfidh le tionscnaimh de chuid an Choimisiúin atá le teacht. Is féidir leat iad a fháil i rannán na ndoiciméad thíos.

Is féidir leat cur leis an Díospóireacht ar Líne atá ar siúl faoi láthair maidir leis an bhFuath sa tSochaí a chomhrac: