L-ekwità interġenerazzjonali

Kif nistgħu noħolqu futur aktar ġust flimkien?

Immaġina UE fejn il-ġenerazzjonijiet jingħaqdu flimkien biex noħolqu soċjetà li tiffjorixxi. X’għandu jsir issa biex dan iseħħ?

Il-Kummissarju tal-UE Micallef, li hu responsabbli għall-Ekwità Interġenerazzjonali, iż-Żgħażagħ, il-Kultura, u l-Isport, ingħata l-biċċa xogħol li jfassal strateġija biex tissaħħaħ il-komunikazzjoni bejn il-ġenerazzjonijiet.

Dan għandu jiżgura li l-interessi taċ-ċittadini, kemm tal-lum kif ukoll ta’ għada, jintisġu fil-politika u t-tfassil tal-liġijiet tal-UE. Din hija biċċa xogħol iebsa minħabba li tikkonċerna mhux biss il-preżent iżda wkoll il-futur, kif ukoll l-inizjattivi politiċi kollha tal-UE.

Iżda flimkien nistgħu niżguraw il-prosperità għall-ġenerazzjonijiet kollha, anki dawk tal-futur.

Biex nagħmlu dan, qed norganizzaw sensiela ta’ djalogi strateġiċi maċ-ċittadini, mal-istituzzjonijiet, u mas-soċjetà ċivili biex fuqhom nibbażaw din l-istrateġija futura u niżguraw li jinstemgħu l-ilħna ta’ kulħadd. Kompli aqra biex issir taf kif tista’ tagħmel il-parti tiegħek.

Għaliex għandi nieħu sehem f’dan id-dibattitu?

Ninsabu f’mument kruċjali fl-istorja għax qatt daqs illum ma kienu jikkoeżistu daqstant ġenerazzjonijiet. Fid-dawl tal-isfidi klimatiċi, ekonomiċi, u demografiċi li qed niffaċċjaw, huwa kruċjali li l-ebda ġenerazzjoni — tal-lum jew tal-futur – ma titħalla taqa’ lura.

Huwa għalhekk li rridu li numru kemm jista’ jkun kbir ta’ ċittadini tal-UE jsemmgħu leħinhom dwar il-preżent u dwar il-futur.

Iċ-ċittadini ta’ kwalunkwe età u ġenerazzjoni għandhom id-dritt li jgħixu f’dinja nadifa, prospera, u ġusta.

Jekk naġixxu issa, flimkien, dan il-futur nistgħu nagħmluh realtà.

Ipparteċipa

L-ekwità interġenerazzjonali: x’inhuma r-riskji?

Ilkoll kemm aħna, żgħażagħ u inqas żgħażagħ, għandha interess dirett f’dak li se jġib miegħu l-futur u f’kif nixtiequ li jkun. L-istess jgħodd għall-ġenerazzjonijiet futuri — dawk li għadhom ma twildux.

Biex niżguraw li d-drittijiet tal-ġenerazzjonijiet preżenti u ta’ dawk tal-futur jiġu rispettati, nixtiequ nisimgħu x’għandhom xi jgħidu l-gruppi ta’ età u atturi kollha biex noħolqu djalogu interġenerazzjonali sinifikattiv.

Fl-2025, se naħdmu flimkien minn Frar sa Novembru biex infasslu strateġija li tirrifletti l-ħtiġijiet tal-ġenerazzjonijiet kollha — il-vuċi tiegħek hija importanti f’kull stadju.

Barra minn hekk, agħti daqqa t’għajn lejn l-avvenimenti li se jsiru dwar l-ekwità interġenerazzjonali u żid mal-lista kwalunkwe avveniment li mhux imniżżel. Irridu niżguraw li int u ċ-ċittadini kollha tkunu tafu bid-diskussjonijiet u l-attivitajiet li jkunu qed jiġu organizzati qribkom, fl-Ewropa u lil hinn minnha, u tieħdu sehem fihom.

Ixxerja l-avvenimenti tiegħek

Kronoloġija

Minn Frar sa Novembru 2025 se nkunu qed infasslu l-istrateġija, f’kollaborazzjoni miegħek.

Frar – April
Niddefinixxu l-ambitu
X’nifhmu b’ekwità interġenerazzjonali? X’inizjattivi jeżistu diġà?
Ġunju – Lulju
Nelaboraw il-viżjoni
Kif timmaġinaha? Għaliex?
Awwissu – Ottubru
Ideat għall-istrateġija
X’inhuma l-ideat, il-valuri, il-ħtiġijiet, u l-azzjonijiet ewlenin?
Ottubru – Novembru
Noħolqu l-istrateġija flimkien
Fejn irridu mmorru? X’toroq għandna nieħdu?

Definizzjoni tal-ambitu: sommarju tal-fehmiet u tal-ideat

Ninsabu entużjasti biex nagħtu informazzjoni dwar il-progress li sar fil-fażi tad-definizzjoni tal-ambitu, li biha identifikajna l-għeruq tal-problemi li qed jiżdiedu b’rabta mal-ekwità interġenerazzjonali, kif ukoll oqsma rilevanti fejn hemm bżonn li tittieħed azzjoni. Ir-riżultati tal-fażi tad-definizzjoni tal-ambitu, kif ukoll l-analiżi tal-kontribuzzjonijiet tiegħek għaliha, jinsabu fit-taqsima tad-dokumenti hawn taħt.

Nelaboraw il-viżjoni: nimmaġinaw futur ikkaratterizzat mill-ekwità interġenerazzjonali

Fil-fażi tat-tiswir tal-viżjoni, tlabnik timmaġina kif jista’ jkun futur ikkaratterizzat mill-ekwità interġenerazzjonali. Inti qsamt l-ideat tiegħek dwar kif nies ta’ etajiet differenti jistgħu jidħlu f’ħajjet xulxin u kif wieħed jista’ jibni rabtiet mal-ġenerazzjonijiet tal-passat u tal-futur. Bl-għajnuna ta’ kittieba letterarji, se nużaw il-kontribuzzjonijiet tiegħek biex noħolqu stejjer stimulanti dwar futuri aktar ġusti. Ir-riżultati ta’ din il-fażi se joħorġu dalwaqt; żomm ruħek aġġornat.

Skopri aktar

Ideat għall-istrateġija: x’nistgħu nagħmlu biex il-viżjonijiet tagħna nagħmluhom realtà?

Il-fażi li jmiss fil-proċess hija dik tal-“ideat għall-istrateġija”. Se naħsbu dwar ideat u azzjonijiet ewlenin li nistgħu nwettqu biex il-viżjonijiet li sawwarna u qsamna bejnietna nagħmluhom realtà. Ingħaqad magħna biex flimkien niddeċiedu kif nistgħu noħolqu futur aktar ġust.

Ipparteċipa

Noħolqu l-istrateġija flimkien: iċ-ċittadini fuq quddiem

F’din l-aħħar fażi nistiednu liċ-ċittadini li jipparteċipaw fil-Panel taċ-Ċittadini Ewropej dwar il-Ġustizzja Interġenerazzjonali biex jibnu fuq il-ħidma mwettqa fil-fażijiet preċedenti filwaqt li jġibu wkoll ideat ġodda u jesploraw oqsma ġodda li jistħoqqilhom attenzjoni. Il-viżjoni, il-prijoritajiet, u r-rakkomandazzjonijiet kollettivi taċ-ċittadini se jikkontribwixxu għar-riflessjonijiet li qed isiru bħalissa dwar l-abbozzar tal-Istrateġija għall-Ekwità Interġenerazzjonali.

Għaliex għandna bżonnha?

Kont taf?

Inqas minn nofs l-Ewropej jemmnu li s-soċjetà hija ġusta u ugwali (sors: Ewrobarometru – 2022)
B’mod ġenerali, il-pajjiżi b’inqas inugwaljanzi relatati mal-età għandhom livelli ogħla ta’ sodisfazzjon tal-ħajja (sors: OECD – 2020)
Il-gvernijiet li jibbilanċjaw il-ħtiġijiet u l-interessi tal-ġenerazzjonijiet preżenti u ta’ dawk futuri jgawdu livelli ogħla ta’ fiduċja (sors: OECD – 2023)