Immaġina soċjetà fejn il-fehim, l-empatija, u l-kooperazzjoni bejn il-ġenerazzjonijiet jagħtu l-ħajja lill-komunitajiet tagħna. Din l-inizjattiva hija aktar minn sempliċiment konsultazzjoni; hija vjaġġ lejn futur possibbli msawwar minn stejjer mimlija ispirazzjoni ta’ kollaborazzjoni u solidarjetà. Sir in-narratur u rrakkontalna esperjenzi ġodda u possibbli ta’ kif wieħed jista’ jgħix f’dinja kkaratterizzata mill-ekwità interġenerazzjonali. L-istejjer tiegħek se jkunu ta’ motivazzjoni għal ħaddieħor biex nibnu legat dejjiemi għall-ġenerazzjonijiet futuri.
Viżjonijiet kollettivi: Għaliex l-istejjer tiegħek huma importanti?
Meta taqsam l-emozzjonijiet, il-ħsibijiet, u l-azzjonijiet marbuta mal-esperjenza tal-ekwità interġenerazzjonali, l-istorja tiegħek tista’ tittrasforma dawn l-esperjenzi minn sempliċi immaġinazzjoni f’realtà. L-istorja tiegħek se turi l-importanza li naħsbu lil hinn mill-interessi tagħna, filwaqt li tispira lil ħaddieħor, inkluż lilna fil-Kummissjoni Ewropea, biex nieħdu azzjoni sinifikattiva.
Se nirreaġixxu għall-istejjer tiegħek u se nagħmlu użu minnhom. Permezz tal-esperjenzi u l-għarfien differenti, se nkunu nistgħu niżviluppaw politiki u inizjattivi bil-għan li nrawmu rabtiet aktar b’saħħithom bejn il-ġenerazzjonijiet u niżguraw futur aktar ekwu għal kulħadd, anke għall-ġenerazzjonijiet li ġejjin.
It-timijiet ta’ koalizzjoni, li jinkludu persuni kemm mill-Kummissjoni Ewropea kif ukoll minn barra minnha, qed jaħdmu wkoll flimkien biex jesploraw kif jista’ jkun futur ikkaratterizzat mill-ekwità interġenerazzjonali fl-oqsma ewlenin identifikati fil-fażi tad-definizzjoni tal-ambitu. Fl-aħħar ta’ Ġunju, se niġbru l-istejjer tagħhom, tiegħek, u ta’ dawk li ħarġu waqt workshops oħra, biex flimkien noħolqu viżjoni komuni għall-futur. Bil-għajnuna ta’ kittieba professjonali, se niżguraw li l-aktar stejjer ta’ ispirazzjoni li qsamt magħna jitqiegħdu fuq quddiem nett.
Nibnu fuq ir-riżultati tal-fażi tad-definizzjoni tal-ambitu, Nikkonsultaw il-linji gwida dwar ir-rakkontar tal-istejjer, u Nispiraw ruħna mill-eżempji viżivi tagħna!
Biex niżguraw li l-viżjoni tiegħek issawwar l-istrateġija, nistednuk tuża s-sommarju tar-riżultati mill-fażi tad-definizzjoni tal-ambitu bħala punt tat-tluq. B’dan il-mod, tista’ timmaġina futur ikkaratterizzat mill-ekwità interġenerazzjonali li jindirizza l-kwistjonijiet ewlenin identifikati. Pereżempju:
- Soċjetà li tagħti prijorità lir-riflessjonijiet fit-tul billi tintegra l-ġenerazzjonijiet futuri fil-proċessi tat-teħid tad-deċiżjonijiet.
- Sistema ta’ governanza li tirrappreżenta tassew il-ħtiġijiet ta’ kulħadd, li tinvolvi b’mod attiv il-vuċijiet taż-żgħażagħ u tal-anzjani biex titrawwem demokrazija u koeżjoni soċjali aktar inklużivi.
- Futur fejn il-kollaborazzjoni interġenerazzjonali tindirizza t-tibdil fil-klima u d-degradazzjoni ambjentali, filwaqt li tiżgura pjaneta sostenibbli għal kulħadd.
- Dinja li fiha s-solidarjetà interġenerazzjonali toħloq soċjetà aktar ekwa, li tiżgura l-koeżjoni soċjali u l-aċċess għal servizzi essenzjali bħall-edukazzjoni, il-kura tas-saħħa, u t-teknoloġija diġitali għal kull faxxa ta’ età.
Dawn huma biss uħud mill-ħafna stejjer possibbli li tista’ toħloq billi tiffoka fuq il-kawżi ewlenin u l-oqsma ta’ azzjoni identifikati fil-fażi tad-definizzjoni tal-ambitu.
Tista’ tikkonsulta l-linji gwida tagħna dwar ir-rakkontar tal-istejjer biex tagħti l-ħajja lill-viżjonijiet tiegħek. Dawn jissuġġerixxu tekniki, bħall-Vjaġġ tal-Eroj, li juruk kif iseħħu t-trasformazzjoni u l-kollaborazzjoni, filwaqt li jispirawk timmaġina futur fejn il-ġenerazzjonijiet kollha jirnexxu flimkien.
Fl-aħħar iżda mhux l-inqas, biex tqanqal l-immaġinazzjoni tiegħek u tispira ruħek, ikkunsidra l-eżempji li ġejjin. Dawn huma eżempji viżivi miktuba mill-Blue Book Trainees tal-Kummissjoni Ewropea, li wrewna kif jista’ jkun futur ikkaratterizzat mill-ekwità interġenerazzjonali:
Fil-Forum Ċiviku, ninsab bilqiegħda ħdejn nannti. Qed nirrevedu l-pjanijiet il-ġodda ta’ adattament għat-tibdil fil-klima, imfassla bil-għajnuna ta’ ċittadini ta’ kull età. Id-deċiżjonijiet mhumiex faċli, iżda huma trasparenti u bbażati fuq l-aqwa għarfien disponibbli. Dak huwa l-pedament tagħna. Nannti tiftakar fi żmien meta n-nies kienu jaħsbu li l-futur kellu jiġi kkontrollat bi strateġiji imposti minn fuq għal isfel, fid-direzzjoni mixtieqa. Iżda llum, nittrattawh aktar bħal orizzont komuni, imsawwar mill-evidenza, il-memorja u l-appoġġ. Naċċettaw l-inċertezza, iżda ma ninjorawhiex. Flimkien insawru strateġiji flessibbli.
Qabel kull deċiżjoni ewlenija, norganizzaw konsultazzjonijiet dwar in-natura. Ix-xjenzati, l-artisti, iċ-ċittadini, iż-żgħażagħ u l-anzjani, jingħaqdu flimkien biex jinterpretaw is-sinjali mill-ekosistemi bħala parti mill-proċess demokratiku tagħna. Nistaqsu: X’obbligu għandna lejn dawk li ġejjin warajna? X’għandha bżonn id-dinja ħajja biex tirnexxi? Nittrattaw l-ambjent naturali tagħna bħala sieħeb li rridu naħdmu miegħu, u mhux bħala pajsaġġ li nistgħu niddominawh.
In-nanna tgħid li l-istituzzjonijiet tagħna nbidlu. Issa mmexxu permezz ta’ bilanċ bejn l-opinjoni pubblika u s-sistemi organizzati, l-assemblej, l-inizjattivi lokali, u l-istituzzjonijiet responsabbli li jaħdmu lkoll flimkien. L-ekwità tmur lil hinn mill-introjtu jew l-identità. Il-baġit tal-karbonju jinqasam bejn il-ġenerazzjonijiet. L-aċċess diġitali huwa dritt komuni. U l-appoġġ issa huwa integrat permezz ta’ sistemi li jqisu l-ħtiġijiet ta’ kull età. It-teknoloġija ma titqiesx bħala xi ħaġa sagra. Kull innovazzjoni ewlenija tiġi riveduta minn panels interġenerazzjonali. Tgħallimna li l-kawtela mhijiex reżistenza, iżda hija forma ta’ rispett.
L-Unjoni Ewropea, li jien nagħmel parti minnha, hija vuċi b’saħħitha u kooperattiva. Madankollu, hija ċara dwar il-valuri tagħha u tibni ftehimiet li jservu fit-tul filwaqt li ma toqgħodx lura min-nuqqas ta’ qbil meta jkunu involuti l-ġustizzja, il-klima jew il-paċi. Il-futur kien jinħass ’il bogħod. Issa narah f’kull deċiżjoni li nieħdu.
Kbirt f’komunità bi pjanijiet trasparenti u aċċessibbli għal kulħadd: il-miri tal-enerġija rinnovabbli, il-baġits taċ-ċittadini, it-tabelli li juru b’mod ċar il-progress. Norganizzaw assemblej ta’ kull xahar fejn kulħadd jista’ jsemma’ leħnu; ħadd ma jitħalla jibqa’ lura u ħadd ma jiġi eskluż. In-nanna tgħidli li l-ġenituri tagħha ġġieldu biex jibdlu l-kunsill ġerarkiku l-antik u minfloku ħolqu dawn iċ-ċrieki fejn id-deċiżjonijiet jittieħdu flimkien; għad għandha r-reġistru mikdud li fih ġie rreġistrat l-ewwel dividend kooperattiv. Meta subgħajja jmorru fuq dik il-kitba li diffiċli tinqara għax iċċarat, inħoss sens qawwi ta’ responsabbiltà.
Għalina, l-ekwità hija aktar minn sempliċiment nostalġija; hija kwistjoni ta’ ottimizzazzjoni. L-ambigwità ġġegħilna naġixxu, u għalhekk infasslu xenarji futuri, inwettqu simulazzjonijiet, u naqsmu l-kodiċi. Qabel ma nħawlu s-siġar fil-komunità, nivverifikaw il-kwalità tal-ħamrija, neżaminaw b’mod rigoruż ir-riformi tal-pensjonijiet, u nkejlu sew il-kumpens għall-emissjonijiet tal-karbonju sabiex it-tfal tat-tfal tagħna ma jirtux defiċits, iżda dividendi. Madankollu, l-ispreadsheets jibqgħu jfakkruni li l-bniedem huwa soġġett għall-iżball. Nara lil Zion, tifel ta’ seba’ snin, kurjuż dwar l-arloġġ li jiċċekkja l-kwalità tal-arja, li għandu mal-polz, u nwiegħed lili nnifsi: il-futur li qed nibnu għandu dejjem jagħti lok għall-mistoqsijiet tiegħu.
Għalhekk, illejla se naġġusta l-mudell mill-ġdid. Se ninkludi l-kurżità bħala fattur ewlieni, biex nuri li r-responsabbiltà u l-innovazzjoni jistgħu jimxu id f’id.
Inħeġġuk tagħti sehmek billi tħalli l-ideat tiegħek dwar dawn l-istejjer jew tikkontribwixxi bi storja tiegħek stess. Kull għamla ta’ storja hi aċċettabbli, sakemm tkun tirrifletti l-viżjoni tiegħek ta’ futur ikkaratterizzat mill-ekwità interġenerazzjonali u ma taqbiżx l-1,000 karattru. Jekk tixtieq ukoll taqsam l-istejjer tiegħek online, jekk jogħġbok żid #OurFutures magħhom.
Il-fażijiet li jmiss: Ideat Strateġiċi u Kokreazzjoni
Dawn il-viżjonijiet kollettivi se jkunu l-punt tat-tluq għall-fażi li jmiss fil-proċess tagħna “Ideat strateġiċi” (Settembru – Ottubru), fejn se nirriflettu dwar l-azzjonijiet konkreti li rridu nwettqu biex il-viżjonijiet li bnejna u qsamna b’mod kollettiv isiru realtà.
Suġġerimenti u l-Pjattaforma OurFutures
Jekk għandek xi ideat jew suġġerimenti biex intejbu l-proċess tagħna, nixtiequ nisimgħu mingħandek. Tista’ tikkuntattjana fuq JRC-INTERGENERATIONAL-FAIRNESS
ec [dot] europa [dot] eu (JRC-INTERGENERATIONAL-FAIRNESS[at]ec[dot]europa[dot]eu).
Forsi għandek ideat oħra dwar kif jista’ jkun futur mixtieq għall-Ewropa, lil hinn mil-lenti tal-ekwità interġenerazzjonali. Jekk iva, nistednuk taqsam il-viżjoni tiegħek fuq il-pjattaforma OurFutures. Dawn l-istejjer jiġu riveduti u analizzati regolarment biex jgħinu lil dawk li jfasslu l-politika jifhmu x’inhu l-aktar importanti għaċ-ċittadini u x’għandu jingħata prijorità fl-aġenda politika.
Ingħaqad magħna f’dan il-vjaġġ eċċitanti biex toħloq futur aktar ekwu għall-ġenerazzjonijiet kollha. Il-vuċi tiegħek tgħodd, u flimkien nistgħu nibnu legat li bis-saħħa tiegħu jibbenifika kulħadd.